အဆိုတော် ဂျနီဖာလိုပက်ဇ် ရဲ့ အလှတရားလျှို့ဝှက်ချက်များ

အသက် ၄၆နှစ်လို့ ဆိုလိုက်လျှင် မည်သူမျှပင် မယုံကြည်နိုင်လောက်အောင်၊ ကလေးနှစ်ယောက်မိခင်လို့ ထင်ရက်စရာ မရှိလောက်အောင် အခုထက်ထိတိုင် လှနေဆဲ၊ ဆွဲဆောင်မှုရှိနေဆဲဖြစ်တဲ့ Jennifer Lopez အနေနဲ့ ဘယ်လို ထိန်းသိမ်းစောင့်ရှောက် နေထိုင်စားသောက်ပြီး ဘယ်လို လေ့ကျင့်ခန်းတွေ လုပ်ဆောင်သလဲ ဆိုတာ လေ့လာကြည့်လိုက်ရအောင်။

(၁) ကခုန်ခြင်းကိုနှစ်သက်ခြင်း

J.Lo က Dancer တစ်ယောက် ဖြစ်တဲ့အတွက် ကခုန်ခြင်းကို နှစ်သက်တာကတော့ သူမရဲ့အဆန်းတကြယ် လျှို့ဝှက်ချက်တစ်ခုတော့ မဟုတ်ပါဘူး။ ၂၀၁၄ ခုနှစ်လောက်က ပေါင်ချိန် ၁၀ပေါင်ကျသွားရခြင်းဟာ ဟင်းသီးဟင်းရွက်စားသုံးခြင်း၊ နေ့စဉ်ခြောက်နာရီကြာ ကခုန်ခြင်းကြောင့်လို့ ဖော်ပြထားတဲ့အတွက် အကဟာ သူမအတွက် ကိုယ်ခန္ဓာအချိုးကျလှစေဖို့ အထောက်အပံ့ကောင်း တစ်ခုဖြစ်တယ်လို့ ဆိုနိုင်ပါတယ်။ “ကျွန်မအနေနဲ့ ခန္ဓာကိုယ်အချိုးအစား ပြေပြစ်ဖို့အတွက် လေ့ကျင့်ခန်းကို ရူးသွပ်စွာလုပ်သူ မဟုတ်ပါဘူး။ ဒါပေမယ့် ရှိုးပွဲတွေအတွက် ကခုန်နေရခြင်းက ကျွန်မ သွယ်လျလှပ အချိုးကျနေစေခြင်းရဲ့ လျှို့ဝှက်ချက်တစ်ခုပါ” လို့ ဆိုထားပါတယ်။



(၂) ကျန်းမာရေးနဲ့ညီညွတ်စွာ စားသုံးခြင်း 

အစာမစားတာမျိုး မလုပ်ပါနဲ့။
J.Lo အနေနဲ့ ကျန်းမာရေးနဲ့ ညီညွတ်စွာ အမြဲစားသုံးနေသူဖြစ်ပြီး လှချင်လို့ အဆာခံကာ ကိုယ်အလေးချိန် ချတာမျိုး မလုပ်ဖူးပါဘူးလို့ ဆိုထားပါတယ်။

တစ်နေ့မှာ 5 နပ်စားပါ။
သူမအနေနဲ့ အာဟာရပြည့်မီတဲ့ အစာကို အချိန်မှန်စားတယ်။ ကြက်ဆင်သားကင်၊ အရိုးထွင်ထားတဲ့ ဆော်လမွန် ငါးပြုတ်၊ မလိုင်ထုတ်ပြီးသား ဒိန်ခဲပျော့၊ ပုစွန်ထုပ်၊ ကော်ဖီစတဲ့ အစားအစာတွေကို တစ်နေ့တာမှာ ပါဝင်အောင် စားသူ ဖြစ်ပါတယ်။ အဓိကအချက်က စားသင့်တဲ့အချိန်မှာ စားသင့်တဲ့ အစားအသောက်ကိုသာ စားဖို့ပါပဲ။



လောဘမကြီးပါနဲ့။
ကာဗိုဟိုက်ဒရိတ်ပါတဲ့ အစားအစာတွေ၊ အသား၊ အမြန်ပြင်အစားအစာ၊ ချောကလတ် ကွတ်ကီးလို အစားအစာမျိုးတွေ ကလည်း သူမရဲ့ အစားအစာစာရင်းမှာ ပါဝင်ပါတယ်။ ဒါပေမယ့် ကိုယ်ကြိုက်နှစ်သက်တဲ့ အစားအစာဖြစ်လို့ စားပေမယ့် လောဘတကြီးနဲ့ အများကြီးတော့ စားလေ့မရှိပါဘူးတဲ့။

ကိုယ့်ကိုကိုယ် ချစ်ပါ။
မိမိပိုင်ဆိုင်ထားခွင့်ရတဲ့ ခန္ဓာကိုယ်ကို ချစ်တတ်တဲ့ စိတ်တစ်ခုသာ မွေးထားပါ။ ဒီလိုစိတ်ထားမယ်ဆိုရင် ကိုယ့်ခန္ဓာကိုယ်ကို လိုသလို ပုံသွင်းလို့ရနိုင်တယ်လို့ ယုံကြည်ထားသူ ဖြစ်ပါတယ်။




ပရိုတင်းဓာတ်တွေကို မှီဝဲပါ။ ရေများများ သောက်ပါ။
ပရိုတင်းဓာတ်ဟာ အိုမင်းခြင်းကို နှေးကွေးစေပြီး ဆဲလ်သေတွေနေရာမှာ ဆဲလ်အသစ်တွေ လျင်မြန်စွာ ၀င်ရောက်စေနိုင်တဲ့အတွက် ပရိုတင်းဓာတ်ရစေမယ့် အသား၊ ပဲပုပ်နဲ့လုပ်ထားတဲ့ အစားအစာတွေဟာ သူမရဲ့ အဓိကစားတဲ့ အစားအစာဖြစ်တယ်လို့ ပြောပါတယ်။ ဒါ့အပြင် အသားအရေ ကြည်လင်စေဖို့၊ ခန္ဓာကိုယ်တွင်း စင်ကြယ်စေဖို့ ရေသောက်ခြင်းကို မမေ့မလျော့ လုပ်ဆောင်သူဖြစ်ပါတယ်။

(၃) အသားအရေ ထိန်းသိမ်းခြင်း

J.Lo ရဲ့ အသားအရေ ထိန်းသိမ်းပုံကလည်း လွန်စွာရိုးရှင်းတယ် လို့ ဆိုရမှာပါ။ သူမအနေနဲ့ အသားအရေ ဘယ်လိုထိန်းသိမ်းလဲ ဆိုတာနဲ့ ပတ်သက်ပြီး ပြောကြားထားတာက “ကျွန်မအနေနဲ့ အရေပြားဆရာဝန်နဲ့ တိုင်ပင်ပြီး Cleanser သုံးရပါတယ်။ ဘာကြောင့်လဲဆိုတော့ မိတ်ကပ်ကို အမြဲလိမ်းနေရသူဖြစ်တာကြောင့် အမျုိးအစားကောင်းပြီး ကိုယ့်အသားအရေနဲ့ ကိုက်ညီတဲ့ Cleanser ကိုသုံးဖို့ လိုအပ်တာကြောင့်ပါ။ Makeup removerကို အပျော့စားသုံးပြီး မိတ်ကပ်လိမ်းတဲ့အခါ Foundation အဖြစ် Sunscreen-moisturizer ကို သုံးပါတယ်။ အိပ်ရေး၀၀အိပ်ပါတယ်”လို့ ဆိုပါတယ်။




(၄) လေ့ကျင့်ခန်းပုံမှန်လုပ်ခြင်း

J.Lo အနေနဲ့ Tracy Anderson Method အတိုင်း ကိုယ်ကာယလေ့ကျင့်ခန်း လုပ်လေ့ရှိပြီး ကယ်လိုရီအပိုတွေကို လောင်ကျွမ်းစေဖို့ အကောင်းဆုံးနည်းလမ်းလို့ ကျွမ်းကျင်ပညာရှင်တွေက သတ်မှတ်ထားတဲ့ Cardio exercises (စက်ဘီးစီးခြင်း၊ ပြေးခြင်း၊ လက်ဝှေ့ထိုးခြင်း၊ Stair master ဖြင့်လေ့ကျင့်ခန်းလုပ်ခြင်း) ကို နေ့စဉ်လုပ်ဆောင်သူဖြစ်ပါတယ်။ 




ဒီလိုလေ့ကျင့်ခန်းတွေနဲ့ သူမခန္ဓာကိုယ် လိုက်လျောညီထွေဖြစ်သွားစေဖို့ ထပ်တလဲလဲ လုပ်ဆောင်လေ့ရှိတယ် လို့လည်း ဆိုထားပါတယ်။ ကိုယ်အလေးချိန်နဲ့ ပတ်သက်ပြီး J.Loရဲ့ ထူးခြားတဲ့ ယုံကြည်ချက်ကတော့ သတ်မှတ်ထားတဲ့ ကိုယ်အလေးချိန်ထက် ပိုကျသွားခြင်းဟာ စွမ်းအင်တွေ ဆုံးရှုံးသွားခြင်းဖြစ်တယ်လို့ ယူဆထားခြင်းပါ။ ကြံ့ခိုင်သန်စွမ်းနေတဲ့ ကိုယ်ဟန်ကသာ လူတစ်ယောက်ကို ပိုကြည့်ကောင်းစေတယ်လို့ ခံယူထားသူဖြစ်ပါတယ်။ ဒါကြောင့် ခန္ဓာကိုယ် ကြံ့ခိုင်သန်စွမ်းစေတဲ့ လေ့ကျင့်ခန်းတွေကို တစ်ပတ်လျှင် နှစ်ကြိမ် ဒါမှမဟုတ် သုံးကြိမ်ခန့် Trainer ရဲ့ ကြီးကြပ်ပေးမှုအောက်မှာ စိတ်ပါဝင်စားစွာ လိုက်နာဆောင်ရွက်လျက်ရှိသူ တစ်ယောက်ပါ။




နောက်တစ်ခု ထူးခြားချက်ကတော့ အမြွှာလေးနှစ်ယောက် မွေးပြီးနောက်မှာ J.Lo အနေနဲ့ ကျစ်လစ်ပြီး အချိုးအစား ကျလှတဲ့ သူမရဲ့ ခန္ဓာကိုယ်အချိုးအစားကို မထိန်းထားနိုင်လောက်တော့ဘူးလို့ အာရုံစိုက်နေကြတဲ့ လူအများရဲ့ ထင်မြင်ချက်ကို ဆန့်ကျင်လိုက်ခြင်းဖြစ်ပါတယ်။ ထိုင်ထလေ့ကျင်းနည်း အမျိုးမျိုးလုပ်ခြင်း၊ တင်သား၊ ပေါင်သားနှင့် ခြေသလုံးသား လေ့ကျင့်ခန်းများ လုပ်ခြင်းဖြင့် အဆီပိုတွေကို ကျသွားအောင် လုပ်ဆောင်ခဲ့ပြီး နဂို မိမိကိုယ်ဟန် အနေအထားအတိုင်းဖြစ်အောင် ကြိုးစားခဲ့ခြင်းကြောင့် ယနေ့ထက်ထိ အလှဘုရင်မဖြစ်နေတယ် လို့ ဆိုရမှာပါ။

“ မိမိလိုချင်တဲ့ ခန္ဓာကိုယ်အချိုးအစားဖြစ်အောင် လုပ်မယ်လို့ စိတ်အားထက်သန်မယ် ဆိုရင် လေ့ကျင့်ခန်းမ (Gym) သွားမှရမယ်ဆိုပြီး ကိုယ့်ကိုယ်ကို တွန်းအားပေးနေစရာ မလိုဘဲ လေ့ကျင့်ခန်း လုပ်ချင်စိတ်တွေ အလိုအလျောက်ဖြစ်လာမှာပါ” ဆိုတဲ့ သူမရဲ့ထင်မြင်ချက်ကိုလည်း ပြောပြထားပါတယ်။

အောင်မြင့်မြတ်(Myanmar Youths)